Samarqand shahrida qurilish sohasidagi eng nufuzli tadbirlardan biri – “Build Pro Expo 2024” xalqaro ko‘rgazma va forumi bo‘lib o‘tdi. Ushbu ko‘rgazma o‘z miqyosi, innovatsion loyihalari va ishtirokchilar tarkibi bilan barchaning e’tiborini tortdi.

Ko‘rgazmada O‘zbekistonning barcha hududlari va qo‘shni davlatlardan 90 dan ortiq kompaniya ishtirok etdi. Tadbir davomida zamonaviy qurilish materiallari, innovatsion texnologiyalar va sektorni rivojlantirishga qaratilgan yechimlar taqdim etildi.

SamDAQU jamoasi ham o‘z loyihalari bilan faol qatnashdi. Universitetga ajratilgan maxsus joyda talabalarning ijodiy ishlari, innovatsion loyihalari va ilmiy ishlanmalar namoyish etildi.

Tadbirda universitet rektori Dr. Chidem Turkyilmaz ham ishtirok etdi va jamoaning ishlari bilan yaqindan tanishdi. Rektor talaba va professor-o‘qituvchilarning ijodiy yondashuvlarini yuksak baholab, tadbir ishtirokchilariga iliq tilaklarini bildirdi.

“Build Pro Expo 2024” – nafaqat qurilish sohasidagi yangiliklarni o‘rganish, balki universitetlar va ishbilarmonlar o‘rtasida hamkorlikni mustahkamlash uchun muhim maydon bo‘ldi.