Mirzo Ulug‘bek nomidagi Samarqand davlat arxitektura-qurilish universitetiga Qozogʻiston Respublikasi Aktyubinsk regional universiteti “Badiiy mehnat va dizayn” kafedrasi oʻqituvchisi Mukanbetkali Aymaganbetov boshchiligida bir guruh professor-oʻqituvchilar va doktorantlar tashrif buyurdilar.

Dastlab tashrif buyurganlar universitet ma’muriyati bilan uchrashib, dastur bo‘yicha tuzilgan yo‘l xaritasi hamda kelgusidagi istibolli rejalarni muhokama qilib oldilar. Shundan so‘ng universitet hayoti va dars jarayonlari bilan tanishdilar.

“Sanʼat” kafedrasi professori Dilshoda Sultonova tomonidan mehmonlarga tasviriy sanʼatga oid kitoblar tuhfa etildi. “Sanʼat” kafedrasi mudiri Akram Sultonov va “Landshaft dizayni” kafedrasi mudiri Hafiza Hasanovalar tomonidan Samarqand shahridagi Sanʼat galereyalaridagi koʻrgazmalar va diqqatga sazovor qadamjolardan biri bo‘lmish Registon majmuasi hamda Boqiy shahar boʻylab qiziqarli sayohatlar tashkil etildi.

Tashrif soʻnggida hamkorlik memorandumi imzolandi. Sanʼat va dizayn sohasidagi kelgusi hamkorlik rejalari oʻzaro kelishib olindi.