Mirzo Ulug‘bek nomidagi Samarqand davlat arxitektura-qurilish universitetiga Amerika Qo‘shma Shtatining Minnesota universiteti prorektori Harvey Charles tashrif buyurdi.

Uchrashuvda universitet rektori Chidem Turkyilmaz, Strategik rivojlantirish bo‘yicha birinchi prorektor Botir Ibragimov, Ilmiy ishlar va innovasiyalar bo‘yicha prorektor Abror Gadayev, Moliya-iqtisod ishlari prorektori Bahodirxon Safarov, Yoshlar masalalari va ma’naviy-ma’rifiy ishlar bo‘yicha birinchi prorektor Sherzod Uzoqov, o‘quv ishlari bo‘yicha prorektor Murod Xodjabekovlar qatnashdi.

Harvey Charles tomonidan xorijiy oliygohning taqdimoti, yaratilgan sharoitlar, o‘quv-ilmiy jarayonlarning tashkil etilishi, istiqbollari, yo‘nalishlari haqida batafsil ma’lumot berildi. Uchrashuvda tomonlar o‘rtasida o‘qituvchilar va talabalar almashinuvini joriy etish, hamkorlikda qo‘shma ta’lim dasturlarini yo‘lga qo‘yish hamda ilm-fan sohasining o‘qitilishini yanada rivojlantirish, amerikalik malakali mutaxassislarni o‘quv jarayoniga jalb etish kabi masalalar yuzasidan muzokaralar olib borildi.